سبوبة

عادل التونى الجمعة سبتمبر 12, 2008 7:15 am

سبوبة
=====
سبوبة 15811611

المعلق قائلا : بطلنا راكب الفرس ....وده فرس مصرى اصيل واحنا عارفين ان سلالة الخيول المصرية هى احسن السلالات فى العالم
===================
وفى انبهار جلست اتابع مسابقة قفز الحواجز لبطلنا الهمام ليس حبا فى اللعبة ولكن لان ابنى عمر يحب الخيول كثيرا وبصراحة انا اتشجعت واتكيفت من كلام المعلق ...
فلا محالة سنضمن على الاقل البرونزية فى بكين وتبقى التانية لنا واهو الاعور احسن من الاعمى !!
ودخل فارسنا الهمام على الحواجز نافخ ريشه وياأرض انهدى ماعليكى ادى , وسقط اول حاجز قولنا معلش , وسقط تانى حاجز قلنا مايضرش
ولكن فارسنا الهمام لم يهدأ له بال ولم يستقم له حال الا عندما اسقط اى حاجز يقف امام وكان عددهم 12 حاجز !!!
فوجدت ابنى عمر انزوى فى ركن الحجرة وكادت الدمعة تفر من عينه .. ورحت اهنئه على فارسنا المغوار وقلت له شفت الفارس بتاعنا لم يترك حاجز الاواطاح به والله برافو عليه احنا كده نضمن الميدالية الدهب مستريحين !!!
فنظر لى الولد نظرة احسست من عينيه اننى فى مأزق وقال لى غاضبا ... المفروض يابابا الفارس مايوقعش ولا حاجز واحد !!!
فأحسست ساعتها اننى بينى وبين الفروسية كما بين عم حمامة الزبال ويورى جاجارين !!!
ولكن تمالكت نفسى وقلت له طيب ما أنا عارف ان الفارس لازم يقفزالحواجز من غير ما يسقط حاجز على الارض
بس العيب مش فى الفارس بتاعنا لالالا والف لا
العيب فى الدولة المنظمة للبطولة واتحاد الفروسية العالمى كان لازم يربط الحواجز كويس علشان ماتسقطش على الارض
فوجدت الولد ينظر لى نفس النظرة السابقة وتركنى اكمل السباق وحدى !!!
====================
من مذكرات كفراوى
عادل التونى